(Ka bilow bidix) weriye Xamdi Mahad, weriye Haboon Cali iyo weriye Hani Xuseen.
(Ka bilow bidix) weriye Xamdi Mahad, weriye Haboon Cali iyo weriye Hani Xuseen. | Sawirka/SJS.

MUQDISHO, Soomaaliya, 8 Maarso, 2021 – Xuska Maalinta Caalamiga ah ee Haweenka 2021, Ururka Suxufiyiinta Soomaaliyed (SJS) wuxuu ku baaqayaa u sinnaanta fursadaha iyo xuquuqaha ee dhanka haweenka suxufiyiinta Soomaaliyeed.

Sanadkan halku dhigga Maalinta Caalamiga ah ee haweenka 2021 waa ”Haweenka ku jira hoggaaminta: Gaarista mustaqbal loo siman yahay iyadoo lagu guda jiro dunida COVID-19″. SJS waxay aqoonsan tahay dedaalka baaxadda leh ee ay ku bixinayaan haweenka suxufiyiinta sidii ay u shacabka ugu wargelin lahaayeen cudurkan safmarka ah ee Covid-19, iyagoo dadweynaha u bidhaaminaya gaabisyada jira.

Xoghayaha Xuquuqda Haweenka ee SJS, Hinda Daahir Jaamac ayaa faahfaahisay caqabadaha ay wajahaan haweenka warfidiyeenka ah ee Soomaaliyeed.

Xoghayaha Xuquuqda Haweenka ee SJS, Hinda Daahir Jaamac.
Xoghayaha Xuquuqda Haweenka ee SJS, Hinda Daahir Jaamac. | Sawirka/SJS.

”Haweenka suxufiyiinta ah waxay u bareerayaan khatarta cudurka COVID19, iyagoo soo tebinaya wararka la xiriira cudurka si ay shacabka u wargeliyaan dedaalada lagu badbaadinayo nafta dadweynaha. Tani waxaa dheer caqabadaha haweenka suxufiyiinta ka heysta dhinaca shaqada iyo tacadiyada loo geysto intaba,” Hinda Daahir, Xoghayaha Haweenka SJS ayaa tiri, ”Haweenka Suxufiyiinta Soomaaliya waa kuwa ugu mushaharka yar, halka qaar badana ayba waayeen shaqooyinkooda, ayna awoodi waayaan inay qoysaskooda maareeyaan. Waxaa la gaaray xiligii la aqoonsan lahaa haweenkeena suxufiyiinta ah, lana siin lahaa xushmadda ay mudan yihiin: mustaqbal loo siman yahay oo welwel la’aan iyo xadgudub la’aan ah, mustaqbal la maareyn karo, nabad ah, xuquuqdana loo siman yahay.”

Si loo muujiyo doorka haweenka suxufiyiinta, SJS waxay la hadashay gabdhaha suxufiyiinta qaarkood kuwaasoo sheegay in si ay dadweynaha u siiyaan xogta ay halis ka soo wajahdo inta ay ku gudaha jiraan shaqo maalmeedkooda saxaafadeed.

Weriye Xamdi Mahad Diiriye oo ka tirsan idaacadda iyo telefishanka Risaala.
Weriye Xamdi Mahad Diiriye oo ka tirsan idaacadda iyo telefishanka Risaala. | Sawirka/SJS.

”Haddii aan nahay gabdhaha suxufiyiinta, waxaanu safka hore kaga jirnaa dagaalka lagula jiro la dagaalanka cudurka safmarka ah ee COVID-19. Gabdhaha Suxufiyiinta keliya war tebin kuma koobna, ee hooyo ahaana waxa ay talooyin caafimaad siiyaan qoysaska iyo shacabka guud ahaan. Taasina waa sababta adduunyadu ugu baahan tahay in haweenku qeyb ka noqdaan meel walba oo go’aan lagu gaarayo,” weriye Xamdi Mahad Diiriye oo ka tirsan idaacadda iyo telefishanka Risaala ayaa SJS u sheegtay.

Suxufinimadu, weliba tan ay dumarka qabtaan shaqo sahlan ma ahan. Haboon Cali Cumar oo ka tirsan TUSMO TV oo go’aansatay inay ka soo guurto magaalada Beledweyne, kaddib caqabado ay kala kulantay dhanka shaqadeeda awgeed.

Weriye Haboon Cali Cumar, oo ka tirsan TUSMO TV.
Weriye Haboon Cali Cumar, oo ka tirsan TUSMO TV. | Sawirka/SJS.

”Mar walba ayaa tacadiyo la ii geysan jiray, waxayna tacadiyadaas iigu dhacayeen keliya in aan ahay gabar saxafiyad ah. Waxaan go’aansaday in aan Muqdisho u soo guuro iyadoo qoyskeyga aanan ka helin wax taageero ah. Waxaana shaqadeyda ka sii watay magaalada Muqdisho. Caqabado badan ayaa weli jira laakiin, Alle ayaa mahad iska leh oo iga dhigay gabar isku kalsoon oo ka soo gudubtay caqabadahaas. Hadda maalin walba waxaan soo saaraa barnaamij maalinle ah oo aan aad ugu hanweynahay,” ayey tiri.

Haboon iyo saaxiibteed shaqada Hani waxa ay talooyin ku taageeraan gabdhaha kale ee suxufiyiinta ah taasoo ah isku kalsoonaada oo adkeystana.

Weriye Hani Xuseen Cali oo ka tirsan Radio Sahal iyo TUSMO TV.
Weriye Hani Xuseen Cali oo ka tirsan Radio Sahal iyo TUSMO TV. | Sawirka/SJS.

”Marku haweenku hoggaamiyaan, natiijo wax ool ah baanu aragnaa. Waxaanu u sheegnaa haweenka suxufiyinta in haddii ay ka gudbaan caqabado badan ay ka qaadaan adkeysi iyo isku kalsoonaan,” ayey tiri Hani.

SJS waxay ugu baaqeysaa dowladda iyo maamullada warbaahinta inay ka gudbaan dhaqanka ka hor joogsanaya haweenka suxufiyiinta inay qabtaan maamullada sare si loo xaqiijiyo in awoodda iyo fursadda shaqada loo sinnaado. Haweenka suxufiyiinta ah waa inaysan noqon kuwa ugu mushaharka yar.

”Haweenka suxufiinta waxay door weyn ka qaateen horumarinta warbaahinta, waxayna u qalmaan in fursadaha si siman loo qeybiyo ee dhinaca hoggaaminta warbaahinta,” ayuu yiri Xoghayaha Guud ee SJS, Cabdalle Axmed Mumin oo ammaanay kaalinta gabdhaha suxufiyiinta ee SJS sida ay uga qeyb qaateen horumarinta ururka, iyagoo adeegsanaya xirfadahooda hoggaamineed.

DAAWO GABDHAHA SUXUFIYIINTA OO SJS LA HADLAY