Radio Hiigsi editor, Mohamed Abdiwahab Nuur was illegally arrested on Saturday 29 Feb, 2020 in Mogadishu. | Photo/Courtesy/Private.
Radio Hiigsi editor, Mohamed Abdiwahab Nuur was illegally arrested on Saturday 29 Feb, 2020 in Mogadishu. | Photo/Courtesy/Private.

MUQDISHO, Soomaaliya, 02 Maarso, 2020- Ururka Suxufiyiinta Soomaaliyeed (SJS) wuxuu soo dhoweynayaa sii deynta tifaftiraha Radio Hiigsi, Maxamed Cabdiwahaab Nuur (Abuuja) oo sifo sharci darro ah ugu xirnaa Hay’adda Nabad-sugidda iyo Sirdoonka Qaranka (NISA) tan iyo maalinnimadii Sabtida 29 Febraayo, 2020 sababo la xiriira qormo uu ka sii daayay Idaacada Hiigsi oo ku saabsaneyd ciidamada ammaanka.

Wariye Maxamed Abuuja ayaa la siidaayay abbaare 12:00p.m ee Isniinta 02 Maarso, kaddib dadaal ay sameeyeen qoyskiisa, idaacadii uu u shaqeynayay oo ol’ole u qareemid ah ka heley Ururka Suxufiyiinta Soomaaliyeed (SJS).

“Alle ayaa Mahad iska leh. Maanta xorriyadeyda ayaan dib u helay abaaro 12:00p.m duhurnimo. Markii hore waxaa la igu xiray xabsiga Habar Khadiijo, kadibna waxaa la ii soo gudbiyay xabsiga Godka Jilacow. Wax eed ah oo la igu oogay ma jirin,” wariye Maxamed Cabdiwahaab Nuur ayaa sidaa SJS u sheegay waxyar kadib markii la sii daayay.

“Waxaan u mahadcelinaa Ururka SJS iyo dhammaan suxufiyiintii garab istaagga ii muujiyay intii aan xirnaa,” ayuu sii raaciyay hadalkiisa.

Maxamed waxa uu SJS u sheegay in loo xiray qormadii 26 Febraayo ka baxday Idaacadda Hiigsi oo dhaliilo wax saxaya u jeedinaysay ciidamada ammaanka.

Qoyska Maxamed waxa ay SJS u xaqiijiyeen wax dembi aan lagu soo oogin, isla markaana aanu helin garyaqaan u dooda intuu xirnaa.

Saxafiga aabihis, oo loo diiday in uu wiilkiisa ku booqdo xabsiga, ayaa SJS markii ugu horeysay u xaqiijiyay siideynta wariye Maxamed Abuuja.

SJS waxay ka welwelsan tahay heerka cagajugleynta, hanjabaadaha dilka ah iyo gacan ka hadalka uu ku jiro isticmaalka qori cabbeysan si loo aamusiyo.

“Ururka Suxufiyiinta Soomaaliyeed (SJS) wuxuu soo dhoweynayaa sii deynta saaxiibkeen Maxamed Cabdiwahaab Nuur (Abuuja) oo ahaa tifafitraha idaacadda madaxa-bannaan ee Radio Hiigsi oo sifo sharci darro ah u xirnaa,” Xoghayaha Guud ee Ururka Suxufiyiinta Soomaaliyeed (SJS) Cabdalle Axmed Mumin ayaa yiri isagoo intaa ku daray in ay aad uga welwelsan yihiin heerka hanjabaadda, cagajugleynta iyo gacan qaadka suxufiga loo geystay.

Hanjabaad walba oo loo geystaa suxufi waa dembi, Ururka Suxufiyiinta Soomaaliyeed (SJS) wuxuu ka dalbanayaa Dowladda Federaalka Soomaaliya in ay baaritaan ku sameyso saraakiishii ka dambeysay arrintan, lana horkeeno maxkamad caddaalad ah.